Leiro celebra a XXXIV Festa da Vendima cun programa cheo de tradición e música
A vila de Leiro prepárase para vivir unha fin de semana chea de tradición, música e actividades ao redor do viño co gallo da XXXIV Festa da Vendima. O programa arrinca o sábado 30 de agosto ás 18.00 horas cunha ludoteca infantil e a festa de apertura. Xa pola noite, ás 21.00 horas, abrirase a VI Mostra de Viños de Leiro e ás 22.00 horas o ambiente festivo estará acompañado por música en directo.
O domingo 31 terá lugar o día grande da celebración. A xornada comezará ás 10.00 horas coa recepción e exposición dos acios a concurso. Ás 11.30 horas está prevista a chegada das autoridades e ás 12.00 horas, na praza do Cruceiro, procederase á lectura do pregón, que este ano correrá a cargo do secretario xeral do PP, Miguel A. Tellado Fidalgo.
Pouco despois, ás 12.15 horas, as rúas encheranse de cor coa tradicional desfile de carrozas e charangas desde a rúa Gabino Bugallal ata o Campo da Feira, coincidindo coa VII Concentración de Coches Clásicos. Ás 14.30 horas abrirase o XX Mercado Artesanal no Salgueiral, que contará tamén cunha comida popular.
Xa pola tarde, ás 16.30 horas, farase entrega dos premios dos concursos de acios e carrozas, dando paso a xogos infantís e á festa no Salgueiral. Ás 17.45 horas disputarase o partido de fútbol de veteranos e ás 20.00 horas o público poderá gozar do concerto "Corais da Vendima". A música seguirá sendo protagonista ás 22.00 horas cunha actuación de Roi Casal e un trío musical que pecharán dous días de festa chea de tradición e ambiente popular.