Licitadas as obras de saneamento do río Barbaña e da EDAR de San Cibrao
A Dirección Xeral de Auga, dependente do Ministerio para a Transición Ecolóxica e o Reto Demográfico, iniciou a licitación das obras de “Finalización do saneamento do río Barbaña, e mellora da EDAR de San Cibrao das Viñas fase II (Ourense)”, cun orzamento de 35.743.446,90 euros. A Plataforma de Contratación do Sector Público publicou hoxe o anuncio oficial, establecendo como data límite para a presentación de ofertas o próximo 28 de outubro ás 14:00 horas.
O proxecto foi declarado de interese xeral do Estado segundo a Lei 22/1997, do 8 de xuño, que aproba determinadas obras hidráulicas de carácter prioritario. O seu obxectivo principal é a adecuación do sistema de saneamento do río Barbaña no contorno de San Cibrao e os seus polígonos industriais. Para iso, prevé actuacións na rede de colectores existentes, tanto pluviais como residuais, así como a remodelación integral da estación depuradora de augas residuais (EDAR), de maneira que cumpra cos parámetros de vertido autorizados.
“O compromiso do Goberno de España queda patente nesta emblemática e necesaria obra, se ben a colaboración e implicación de todas as Administracións e a concienciación social e do tecido empresarial é clave para evitar os episodios recorrentes de contaminación ao río Barbaña”, afirmou o presidente.
Con esta actuación, preténdese mellorar a depuración de augas na zona e protexer o río Barbaña, un recurso vital para a cidade e o seu contorno industrial, garantindo a sustentabilidade ambiental e a correcta xestión dos vertidos residuais.