Máis de 1.000 escolares da provincia de Ourense participaron en actividades de formación sensibilización sobre incendios forestais
Máis de 1.000 escolares da provincia de Ourense participaron en actividades de formación e sensibilización sobre incendios forestais promovidas pola Consellería do Medio Rural co obxectivo de concienciar aos máis cativos sobre a importancia da prevención dos incendios forestais, así como dar a coñecer o traballo que realiza o persoal do Servizo de Prevención e Defensa contra os Incendios Forestais (SPIF) e as instalacións existentes na nosa comunidade.
As accións, que teñen previsto ampliarse e integrarse nun programa específico, desenvolvéronse en centros educativos dos concellos de Castro Caldelas, O Barco de Valdeorras, Ourense e A Pobra de Trives. Ademais, tamén se organizaron iniciativas con alumnado de ciclos formativos e universitarios.
As charlas que se impartiron abordaron temáticas diversas e estiveron adaptadas ás idades do alumnado que as recibiu. Por unha banda, leváronse a cabo relatorios divulgativos e de autoprotección, co fin de que os cativos poidan coñecer como actuar en caso de detectar un incendio forestal. Realizáronse tamén talleres formativos e prácticos con exhibicións de manobras con brigadas e autobombas.
Algunhas accións incluíron visitas a zonas afectadas polos incendios forestais deste verán e aos distritos forestais que se atopaban preto dos centros educativos, nas que lles explicaron os labores que se realizan desde estes lugares. Neste sentido, o alumnado puido coñecer en primeira persoa as tarefas de mulching que está a realizar a Consellería do Medio Rural e participar nelas.