Máis de 1.600 estudantes da provincia de Ourense asistirán á representación da obra “A galiña azul” no Auditorio
Afundación levará ao Auditorio Municipal de Ourense os días 1 e 2 de decembro o espectáculo “A galiña azul”, da compañía Tanxarina Títeres. Dirixido a nenos e nenas de 1º e 2º de Educación Primaria, a proposta contará con dúas funcións diarias, ás 10:00 e ás 12:00 horas.
Máis de 1.600 estudantes, procedentes de 42 centros educativos de Ourense e arredores, asistirán a esta representación que foi recoñecida co Premio Fetén ao Mellor Espectáculo de Marionetas e o Premio María Casares ao Mellor Espectáculo Infantil en 2018.
A historia xira arredor de Lourenzo e a súa peculiar galiña azul, que destaca polas súas cinco plumas vermellas na ás dereita e por poñer ovos de cores. Ademais, ao contrario das outras galiñas, non emite o típico “cacaracá” senón un “cocorocó” que preocupa ás autoridades. A obra aborda temas como a diversidade e a solidariedade a través dunha narración tenra que cobra vida grazas á técnica dos títeres.
Afundación inclúe as artes escénicas na súa programación educativa co obxectivo de complementar a formación escolar. Estas actividades fomentan valores como a creatividade, a solidariedade, a autoestima e o traballo en equipo, ao tempo que promoven o desenvolvemento de habilidades sociais e a reflexión entre os estudantes.