Máis de 2.300 escolares de 48 centros educativos da provincia de Ourense aprenden sobre reciclaxe a través do teatro
Afundación, a Obra Social de ABANCA, presenta esta semana no Auditorio Municipal de Ourense a proposta escénica para escolares ‘RRRedobra. A sinfonía do cambio’, de Odaiko Percussion Group, dirixida ao alumnado de 3.º e 4.º de educación primaria, á que asistirán máis de 2.300 estudantes procedentes de 48 centros educativos de Ourense e localidades da contorna.
Nun mundo con escaseza de materias primas e un exceso de residuos, chegou o momento de dar son ao cambio coa Sinfonía do cambio, onde o gran atractivo serán os instrumentos creados pola compañía a partir de materiais reciclados: o botellófono, a batería de bidóns, o tecno tubo e a galesamba, entre outros.
As artes escénicas teñen unha relevancia especial dentro da programación para escolares que deseña cada curso o equipo da área educativa de Afundación, co obxectivo de reforzar a formación que o alumnado recibe nas aulas. Esta programación está deseñada para promover unha educación en valores e competencias transversais, potenciando o talento, a autonomía, a solidariedade, a creatividade, a autoestima e o traballo en equipo.
Neste sentido, as artes escénicas considéranse unha das ferramentas educativas máis eficaces para estimular a capacidade de observación do alumnado, fomentar o diálogo e a reflexión, e desenvolver habilidades sociais.