Máis de 300 escolares participaron na primeira sesión das ‘Tertulias Literarias’
O Liceo de Ourense acolleu, na tarde deste xoves, unha acción dentro do Ciclo de Tertulias Literarias que organizan conxuntamente a Deputación de Ourense e o Concello. Así, un total de 313 escolares e 32 profesores da cidade e da provincia participaron na presentación de “Indolente”, a última obra do escritor e xornalista Alberto Mancebo, poñendo en común experiencias en torno a esta obra e á lectura, acto no que tamén participou o vicepresidente segundo e deputado de Cultura, César Fernández.
Alberto Mancebo (Vimianzo, 1983), é xornalista e escritor. Con 15 anos comezou a colaborar na Cadena SER da súa vila. Licenciado en xornalismo, completou a súa formación profesional en Liverpool. Dende o ano 2004 traballa para a Televisión de Galicia, onde se encargou de diferentes coberturas xornalísticas por toda Europa e en Canadá, Brasil ou Panamá. Durante 5 anos foi correspondente da TVG en Portugal. Actualmentre presenta o Telexornal fin de semana.
“O que me quedaba por dicirche” (Xerais, 2023) foi a súa primeira novela e con “Indolente” (Xerais, 2024), conseguiu o XXX Premio Manuel Lueiro Rey de Novela Curta. Nesta obra, protagonista da acción desta tarde das Tertulias Literarias, Alberto Mancebo crea unha poderosa e inquietante narración cunha atmosfera hipnótica e abafante para enfrontarnos a unha historia de ameazas climáticas que sitúan os personaxes nun escenario agónico e ante a necesidade de se decidiren entre a solidariedade ou a supervivencia individual.