Máis de 65 centros educativos da provincia de Ourense recibiron axudas do Plan de Mellora de Bibliotecas Escolares
Máis de 65 centros educativos da provincia de Ourense beneficiáronse da última convocatoria do Plan de Mellora de Bibliotecas Escolares (Plambe), na que a Consellería de Educación, Ciencia, Universidades e Formación Profesional investiu máis de 80.000 euros.
O delegado territorial da Xunta en Ourense, Manuel Pardo, visitou esta mañá o colexio CEIP Manuel Sueiro, un dos centros que recibiu estas axudas. Durante a súa visita, explicou que esta iniciativa apoia as bibliotecas escolares como espazos estratéxicos para mellorar a calidade educativa, proporcionando recursos para ferramentas de aprendizaxe e material didáctico. Ademais, con estas axudas, os centros poden ampliar os seus fondos bibliográficos, modernizar mobiliario e equipamento, e sufragar gastos de mantemento e xestión das bibliotecas.
Manuel Pardo destacou a importancia das bibliotecas escolares non só como lugares para fomentar a lectura, senón tamén como espazos de traballo en equipo e convivencia. Lembrou que o Goberno galego leva anos impulsándoas a través de programas como Biblioteca Creativa, Lectura e Familias ou os Clubs de Lectura, co obxectivo de convertelas en centros neurálxicos de aprendizaxe e adquisición de competencias, así como motores de innovación e creatividade.
O delegado territorial subliñou o papel fundamental das bibliotecas escolares na implementación do Plan MEGA de mellora educativa en Galicia, especialmente no programa de reforzo da comprensión lectora. Explicou que esta iniciativa artéllase mediante a oferta de actividades e recursos de lectura para toda a comunidade educativa, o que contribúe eficazmente a mellorar a comprensión lectora do alumnado. Así, a biblioteca escolar funciona como un espazo mediador para o desenvolvemento de competencias comunicativas, informacionais e mediáticas, esenciais para a construción do pensamento crítico.