Máis de 70 persoas participaron nunha xornada formativa organizada pola Subdelegación do Goberno no Liceo co gallo do 25N

Avogados, traballadoras sociais, técnicas de igualdade, membros das Forzas e Corpos de Seguridade do Estado, persoal do Centro Penitenciario do Pereiro de Aguiar e da Xunta e ONGs abordaron cuestións relacionadas coa violencia de xénero

Máis de 70 persoas participaron nunha xornada formativa organizada pola Subdelegación do Goberno no Liceo de Ourense con motivo do 25N, Día Internacional da Eliminación da Violencia contra a Muller.

O subdelegado do Goberno en Ourense, Eladio Santos, inaugurou o evento destacando a formación en violencia de xénero como “unha absoluta prioridade” porque, segundo sinalou, “do coñecemento nace a conciencia”.

A xornada contou cun público diverso, entre avogadas, traballadoras sociais, técnicas de igualdade, membros das Forzas e Corpos de Seguridade do Estado, persoal do Centro Penitenciario do Pereiro de Aguiar, representantes da Xunta de Galicia e integrantes de fundacións e ONGs.

Tras a presentación, a maxistrada do Xulgado de Instrución número 3 de Santiago de Compostela, Paz Filgueira, impartiu a conferencia “Retos na loita contra a Violencia de Xénero. Especial referencia aos menores. Balance sobre protección de muller e menores”.
Posteriormente, celebrouse unha mesa redonda titulada “Tipos de violencias sexuais. ONVIOS. Protocolos de intervención e seguridade a vítimas de violencias sexuais. Centro de Crise 24”, na que participaron Carlos Vázquez, inspector xefe da UFAM da Policía Nacional; Luis Ángel Veloso, sarxento xefe da Policía Xudicial da Garda Civil; e Nuria Fernández, coordinadora do Centro de Crise 24 horas.

Acompañado pola xefa da Unidade contra a Violencia sobre a Muller da Subdelegación, María Alida Iglesias, Eladio Santos destacou que a violencia machista “non é un problema illado, senón que é unha realidade estrutural que afecta a milleiros de mulleres, ás súas familias e a toda a sociedade”. Engadiu que “esta lacra é unha manifestación extrema de desigualdade e só pode ser combatida desde a educación, o coñecemento e a implicación colectiva”.

Finalmente, o subdelegado subliñou a importancia da formación para a prevención da violencia de xénero, pois “ás veces pasa desapercibida”. Explicou que “a violencia machista adopta múltiples formas: física, psicolóxica, económica ou sexual. E moitas delas permanecen ocultas baixo dinámicas normalizadas, polo que a formación dota ás persoas de ferramentas para identificar sinais de alerta e desmontar mitos”.