Martín Gil toma as rendas de Novas Xeracións Ourense co reto de impulsar a participación xuvenil
Martín Gil Blanco asumiu a presidencia da xestora provincial de Novas Xeracións do Partido Popular en Ourense tras un encontro na sede da organización onde tamén se reuniu a dirección provincial e autonómica do partido.
Enxeñeiro informático e profesor, Gil afirmou que asume este cargo “como mozos comprometidos coa provincia e co proxecto popular”, destacando a importancia de que a organización sirva como un “apoio real ao partido que atenda as necesidades da mocidade ourensá”.
Entre os seus obxectivos inmediatos está incrementar a implicación dos mozos na organización e preparar a actividade política para as eleccións municipais de 2027. Martín Gil sucede no cargo a Ignacio Campo, que lideraba a xestora desde 2021 e que agora centrará o seu traballo como portavoz do PP en Maside. Campo indicou que “chegou para axudar e agora cede o relevo para seguir aportando”.
Nicole Grueira, presidenta de Novas Xeracións en Galicia, cualificou a renovación como un “relevo natural e consensuado” que contribuirá a que a organización medre con “xente nova que comparte os valores do Partido Popular”. Pola súa banda, Luis Menor, presidente provincial, recoñeceu o labor de Campo e expresou a súa confianza en que Gil “aporte oportunidades á mocidade galega e demostre o talento dos mozos, tanto na política como na vida cotiá”.
Menor engadiu que esta nova etapa debe servir para fortalecer a escoita activa e recoller as inquedanzas da mocidade, un sector esencial da sociedade, para incorporar as súas ideas en futuros procesos electorais e no deseño de políticas públicas.