Medio Rural inviste máis de medio millón de euros na mellora paisaxística de Riós
A Consellería do Medio Rural, a través da Axencia Galega de Desenvolvemento Rural, destinou un total de 50.823,53 euros á recuperación e mellora paisaxística de diferentes fontes no concello ourensán de Riós. En concreto, as actuacións abrangueron a fonte bebedoiro de Mañoás, unha fonte tanque e un pozo en Rubiós, un estanque en Pena do Souto e unha mina na Trepa.
O principal obxectivo destas obras foi o de realizar pequenas actuacións nestas fontes e pozos, cara á recuperación da súa principal función, así como para promover a mellora paisaxística da súa contorna, dotándoas de espazos verdes coidados que poidan ser aproveitados por veciños e visitantes.
Coa execución destes traballos puxéronse en valor estes elementos etnográficos e o papel que desempeñan nas poboacións onde están situados, ademais de destacar a súa relevancia social como punto de encontro, salientando, ao mesmo tempo, o seu valor dende o punto de vista da paisaxe.
Con este tipo de iniciativas búscase mellorar a calidade e condición de vida da poboación, potenciando e estimulando o arraigo desta sobre o territorio que habita e contribuíndo ademais á cohesión da vida social no medio rural.
Trátase, ademais, de procurar a mellora das infraestruturas existentes no territorio, para fortalecer o desenvolvemento do rural galego, mellorar a relación social dos veciños e frear o despoboamento.