O Albergue de Allariz acolle un campamento xuvenil con obradoiros artesáns impulsado pola Xunta
O Albergue de Allariz converteuse no escenario dun campamento xuvenil promovido pola Dirección Xeral de Xuventude da Xunta de Galicia, no que a artesanía ten un protagonismo destacado. A iniciativa conta coa participación de mozos e mozas que, durante a súa estancia, se achegan ao traballo artesanal a través de obradoiros específicos guiados por profesionais do sector.
A alcaldesa de Allariz, Cristina Cid, visitou o campamento, acompañada por Gabriel Alén e Marta Vázquez, director xeral e directora territorial de Emprego, Comercio e Consumo, así como por Elena Fabeiro, xerente da Fundación Artesanía de Galicia. Durante o percorrido, achegáronse aos diferentes obradoiros para coñecer de preto as actividades desenvolvidas e manter un encontro tanto coa mocidade participante como co profesorado encargado das sesións formativas.