O alumnado do CEIP Mestre Vide participou na presentación do libro “Vivas para contarlo”
O subdelegado do Goberno en Ourense, Eladio Santos, e a xefa da Unidade de Violencia sobre a Muller, Alida Iglesias, presentaron este xoves no CEIP Mestre Vide o libro “Vivas para contarlo”, unha iniciativa que xurdiu da Comisión de seguimento das vítimas de violencia de xénero, que mensualmente se reúne na Subdelegación do Goberno en Ourense, e cuxa edición correu a cargo desta última.
A publicación está composta por 13 microrrelatos de vítimas de violencia de xénero e sexual, e 10 testemuños de persoas que comparten a súa vida profesional con vítimas de violencia de xénero.
Esta presentación tivo lugar no marco dunha charla formativa dentro do Plan Director para a Convivencia e Mellora da Seguridade nos Centros Educativos e nas súas contornas, que está a levar por todas as aulas e a achegar a todos os rapaces e rapazas da provincia sesións a cargo de axentes da Garda Civil e da Policía Nacional para contribuír á prevención de condutas delitivas, co fin de evitar comportamentos violentos, consumo de drogas, acoso, ciberacoso, violencia de xénero, entre outros.
Para contribuír a este labor de concienciación, o alumnado presente visualizou un vídeo con fragmentos da publicación, pedíndolles ao remate que analizasen as posibles condutas machistas que detectasen na proxección. Ademais, tamén tivo lugar un coloquio sobre a violencia de xénero para resolver dúbidas, eliminar mitos e fomentar o diálogo e a reflexión sobre este importante tema.
Durante a súa intervención, o subdelegado salientoulle aos máis pequenos a importancia de ter unha vida baseada no respecto e libre de violencia. Ao remate, Santos destacou moi positivamente a implicación do alumnado que, a pesar da curta idade, se mostrou moi interesado polo tema tratado. “A educación é a chave para lograr un futuro sen violencia contra as mulleres”, concluíu.