O barrio de Santa Teresita celebra as súas festas esta fin de semana
O barrio de Santa Teresita prepárase para celebrar as súas festas durante o fin de semana cun programa de actividades variadas para todas as idades. A programación comezará o venres 26 cunha verbena a cargo do grupo Origen.
O sábado 27, de 13:00 a 15:00 horas, terá lugar unha sesión vermú na Avenida de Santiago, na esquina coa rúa Bellao, onde actuará o mariachi "Mi Tierra". Pola noite, a partir das 23:00 horas, a Festa da Mocidade contará coa macrodiscoteca A Gramola.
O domingo 28, as actividades arrancarán de novo coa sesión vermú no mesmo lugar e horario que o sábado. Ao mediodía, ás 12:00 horas, celebrarase a procesión e misa solemne, mentres que ás 19:00 horas a xornada concluirá cunha festa musical a cargo do trío Vaivén.
Estas festas ocasionarán cortes e modificacións do tráfico en varias rúas do barrio. As actuacións musicais desenvolveranse na rúa Río Xares, no cruzamento coas rúas Río Sil e Río Búbal, pechándose estes tramos o venres 26 e o sábado 27 a partir das 18:00 horas e o domingo 28 desde as 17:00.
Pola súa banda, as atraccións festivas estarán nas rúas Santa Teresita e Río Sil, que permanecerán pechadas ao tráfico desde a intersección coa rúa Quintián e a rúa Sío Sil. Tamén se modificará o sentido de circulación na rúa Río Avia, desde Río Sil ata Río Támega, con cortes que comezarán o venres ás 19:00 horas e o sábado e domingo desde as 18:00 horas.