O BNG critica o anuncio do Concello de licitar unha cafetería na actual Oficina Municipal de Turismo de Ourense
Este martes o executivo de Gonzalo Pérez Jácome anunciou o traslado da oficina de turismo que o Concello ten nos baixos do Xardín Padre Feijóo ao edificio administrativo da Praza de San Martiño, alegando que “os altos índices de gas Radon existentes no local da rúa Isabel a Católica” fan necesario este traslado.
Porén, para a formación nacionalista no Concello de Ourense, é “absolutamente sorprendente” que ,“ao mesmo tempo que se traslada unha oficina municipal aducindo razóns de seguridade e saúde debido aos altos índices de Gas Radón existentes na mesma, se anuncie que ese espazo vai ser licitado como cafetería”.
Luís Seara admite “a innovadora proposta de Jácome, café con Radón, xa que non se entende como é posible que un local non sirva para albergar unha oficina de turismo por ser un espazo contaminado pero si unha cafetería” e engade, “a non ser que o que se pretenda é a reforma integral do local para posteriormente polo en mans privadas”.
Desde o BNG entenden que “Jácome ten unha enorme obsesións coas cafeterías e con cederlle aos seus amigos espazos públicos” e sinalan, “máis que como alcalde, actúa como un axente inmobiliario pero xogando co patrimonio de toda a veciñanza”. Os nacionalistas adiantan que pedirán acceso ao expediente e ás medicións de gas radon realizadas no local que ocupa actualmente a oficina de turismo.
Situación da Pajarera.
Desde o BNG insisten na situación de ilegalidade na que se atopa actualmente a empresa que xestiona a cafetería sita no xardín Xaponés, “un espazo municipal, en pleno centro da cidade, sen relación contractual co Concello, sen pagar absolutamente nada en concepto de canon e obtendo altísimos beneficios namentres o Goberno Local, que rescindiu o contrato en outubro segue sen facer nada por paliar tal despropósito”. Desde o BNG temen que a xestión do resto de cafeterías que o Alcalde pretende licitar “sexa como a da Pajarera, algo que sería tremendamente lesivo para o interese xeral ese que agora parece preocuparlle tanto”