O BNG pon en marcha unha campaña de denuncia e reivindicación para esixir o arranxo da N-540
O Bloque Nacionalista Galego iniciou unha campaña de denuncia e reivindicación para esixir o arranxo integral da estrada N-540, que conecta Lugo con Ourense.
Trátase dunha vía fundamental para as comunicacións entre o centro e o sur da provincia, pero o seu estado de deterioración supón un risco para a seguridade das persoas usuarias e afecta aos vehículos que transitan por ela.
Como parte desta iniciativa, o BNG instalou dous valos de denuncia coa mensaxe 'A estrada 540 non pode agardar ata 2027', en referencia ao prazo que o Goberno central estableceu para completar a execución das obras. Un destes valos atópase na entrada a Lugo desde Ourense, e o outro no cruzamento da N-540 coa saída de Chantada.
Representantes institucionais e orgánicos do BNG anunciaron que a campaña se estenderá nas próximas semanas a todo o percorrido da N-540. Organizaranse concentracións de denuncia e apoiaranse iniciativas promovidas pola cidadanía, ademais de presentar propostas en diversas institucións para reclamar unha solución inmediata.
O deputado provincial e vicepresidente da Deputación de Lugo, Efrén Castro, lembrou que "son moitas as persoas que usan esta estrada a diario e non poden agardar ata 2027 nestas condicións, con tramos case impracticables a máis de 20 quilómetros por hora".
Pola súa banda, o deputado parlamentario Iago Suárez criticou que "o Partido Socialista non está a cumprir con Galicia nin coas provincias de Lugo e Ourense, do mesmo xeito que tampouco o fixo no seu momento o Partido Popular". Ademais, anunciou que se presentarán iniciativas en todas as institucións para esixir ao Estado a reparación urxente da vía.
O tenente de alcalde de Taboada, José Portela, expresou a "indignación" da veciñanza ante as condicións da estrada, que provoca danos nos vehículos, como roturas de llantas ou cristais, e desvía o tráfico cara a Monforte, con repercusións "económicas e sociais" para os municipios polos que pasa a vía.
A estrada, que presenta un firme irregular en case todo o seu percorrido pola provincia, ten tramos especialmente deteriorados en A Sabugueira, en Meixonfrío (Taboada), Vilela (Taboada), en Pedrafita (Chantada), na incorporación desde Monterroso cara a Lugo no Alto do Hospital (Portomarín), entre Grumélez e O Castro (Portomarín) e en Calde (Lugo).