O BNG reclama medidas inmediatas na Deputación de Ourense tras a vaga de lumes
O BNG trasladará ao pleno extraordinario da Deputación de Ourense, convocado para mañá mércores, unha serie de medidas dirixidas a facer fronte ás consecuencias da vaga de lumes que arrasou boa parte da provincia este mes. A decisión chega despois de que se incluíse un punto específico na orde do día do pleno para abordar a situación xerada polos incendios en diferentes comarcas, o que levou ao BNG e ao PSOE a retirar a súa petición previa dun pleno extraordinario independente sobre esta mesma cuestión.
O portavoz provincial do BNG, Bernardo Varela, incidiu en que "a prioridade agora é apoiar aos concellos e á veciñanza afectada, e que a Deputación de Ourense estea á altura do que demanda a cidadanía". Advertiu ademais que "non chega con analizar responsabilidades: fan falta respostas inmediatas e compromisos claros para evitar que os lumes volvan ter un impacto tan devastador".
Entre as iniciativas nacionalistas destaca poñer os servizos de obras e medio ambiente da Deputación ao dispor dos municipios afectados para tarefas urxentes, como abrir accesos ou instalar barreiras que minimicen as escorrentías de cinza provocadas polas choivas. Tamén se propón que AquaOurense se poña á disposición dos concellos para garantir a calidade e seguridade das captacións de auga potable.
O BNG reclama igualmente activar de inmediato os compromisos aprobados na moción nacionalista de xullo sobre a mellora da xestión das faixas secundarias de biomasa. Varela subliñou que "se esas medidas estivesen xa en marcha, serían unha axuda fundamental para combater a traxedia deste agosto".
Así mesmo, o grupo provincial nacionalista defende a creación dun equipo de traballo, cun prazo inicial dun mes, no que participen comunidades de montes, concellos, gandeiros e colectivos afectados. O obxectivo sería deseñar actuacións urxentes fronte aos danos e frear o despoboamento das zonas rurais, que se agravou nas últimas catro décadas.
"O despoboamento e a desprotección do noso medio rural están na raíz desta situación", concluíu Varela, reclamando "unha resposta inmediata e de futuro para garantir que Ourense non siga a sufrir as consecuencias dun abandono institucional intolerable".