O campus de Ourense acollerá a segunda edición do Congreso Internacional 'Ontdif'
A Facultade de Educación e Traballo Social do campus de Ourense acollerá os días 5 e 6 de maio a segunda edición do Congreso Internacional Ontdif, titulado ‘Educar Pensando: A Filosofía na Formación do Suxeito Crítico’. Este congreso preséntase como un espazo para a reflexión e o debate sobre o papel fundamental da filosofía na educación actual.
Organizado polo grupo de investigación Ontdif (Ontoloxías da Diferenza. Fundamentos Teóricos e Repercusións Prácticas) da Universidade de Vigo, baixo a coordinación de Brais González e Abraham Rubín, o evento responde á necesidade de contar con ferramentas educativas que fagan crecer o pensamento crítico e a reflexión profunda, especialmente en tempos marcados pola sobrecarga informativa e os cambios sociais acelerados. Segundo os organizadores, a filosofía é precisamente a disciplina que ofrece esas ferramentas, xa que permite ao alumnado cuestionar, analizar e comprender o mundo que os rodea.
O obxectivo principal deste evento é promover a formación de individuos críticos, capaces de pensar por si mesmos, participar activamente na sociedade e cuestionar as realidades impostas. Neste sentido, o congreso ten como propósito explorar como os principios filosóficos poden transformar e enriquecer as prácticas educativas. Entre os principais obxectivos destacan o análisis da relevancia da filosofía na educación, a súa capacidade para desenvolver un pensamento autónomo e crítico, así como o estudo das metodoloxías que integran a filosofía nos programas escolares e universitarios. Ademais, búscase promover prácticas pedagóxicas que capaciten ao alumnado para analizar e cuestionar a información de forma crítica.
O congreso tamén ofrecerá un espazo para o debate sobre as cuestións filosóficas e educativas máis actuais, establecerá estratexias para integrar a filosofía de forma efectiva nos programas educativos e promoverá o intercambio de ideas entre especialistas en filosofía, educación e disciplinas afíns.
A programación do evento compórtase de diversas mesas temáticas que profundarán na relación entre filosofía e educación. Abordaranse temas como “O xenio crítico do Nietzsche educador”, a filosofía como doutrina e como práctica, e “Filosofía para pensar(nos) como outros”. Tamén se explorarán cuestións como a interpretación do suxeito moderno desde o psicanálise lacaniana, a hermenéutica como forma de crítica, “O escaravelho de Wittgenstein: pensar (a pesar de) as palabras” e “Pensar os sentimentos e sentir os pensamentos: un reto filosófico e educativo fronte á crise da nosa época”.