O CEIP de Seixalbo impulsa a lectura con novos programas e máis tempo diario nas aulas
O Colexio Plurilingüe de Seixalbo, en Ourense, está a reforzar a competencia lectora do seu alumnado a través de distintas iniciativas vinculadas á biblioteca escolar, combinando programas específicos con máis tempo dedicado á lectura dentro do horario lectivo.
Este mércores, a directora xeral de Ordenación e Innovación Educativa, Judith Fernández, visitou o centro para coñecer estas actuacións, que cualificou como “un apoio importante na mellora da competencia lectora do alumnado”.
Un dos eixos principais deste traballo é a ‘Hora de ler’, un espazo diario no que o alumnado de Infantil e Primaria dedica tempo á lectura de forma estruturada. Xunto a esta medida, o colexio participa en iniciativas como o Plan de mellora de bibliotecas escolares (Plambe), Biblioteca creativa ou o Club de lectura.
Durante a visita, tamén se puxo en valor o papel destes programas máis alá do ámbito académico. Segundo destacou Fernández, contribúen non só á adquisición de coñecementos, senón tamén a reforzar aspectos como o traballo en equipo, a inclusión e a convivencia.
O percorrido polo centro incluíu a nova ampliación da biblioteca escolar, que incorpora un laboratorio de radio e amplía as posibilidades de aprendizaxe do alumnado.
Estas accións intégranse nunha aposta máis ampla pola innovación educativa, coa que o colexio busca avanzar na comprensión lectora e noutras competencias clave, como a matemática, ao tempo que introduce no seu día a día aspectos como a internacionalización e a sostibilidade.