O Centro Cultural Marcos Valcárcel inaugura a mostra ‘Os Traballos de Hércules’
O Centro Cultural Marcos Valcárcel presentou esta tarde a exposición ‘Os Traballos de Hércules. Colección de gravados das coleccións académicas’, comisariada por José Ramón Soraluce Blond. Esta iniciativa forma parte do programa conmemorativo do 175.º aniversario da Real Academia Galega de Belas Artes, que busca poñer en valor a traxectoria histórica e o papel cultural da institución en Galicia.
A mostra poderá visitarse ata o 30 de novembro e ten como obxectivo achegar o legado artístico da Academia a toda Galicia.
A exposición recolle unha selección de gravados inspirados en ‘Os Traballos de Hércules’, copias da serie de pinturas que Luca Giordano realizou para Carlos II no Casón do Bo Retiro de Madrid, reproducidas pola Calcografía Nacional arredor do ano 1790.
Entre as obras expostas inclúense escenas que representan as doce fazañas mitolóxicas de Hércules, con especial atención ao episodio galego: a loita contra o rei Xerión para recuperar unha manda de bois roubada aos labregos. Segundo a lenda, Hércules venceu ao monarca na Coruña e, sobre a súa tumba, ergueu a Torre de Hércules.