O Centro de Formación e Recursos de Ourense desenvolve máis de 500 actividades dirixidas ao profesorado
O Centro de Formación e Recursos de Ourense está a desenvolver ao longo deste curso máis de 500 actividades dirixidas ao profesorado da provincia, cun volume que supera as 5.000 horas de formación. Así o destacou o director xeral de Centros e Recursos Humanos da Consellería de Educación, Jesús Álvarez, durante a súa visita ao centro para analizar o desenvolvemento do plan anual formativo.
No encontro, o responsable autonómico felicitou ao equipo polo seu labor e puxo en valor o impacto destas accións na mellora da cualificación docente. “Isto pon de manifesto o alto nivel de participación e compromiso do profesorado e o bo traballo do equipo do centro”, afirmou.
A oferta formativa inclúe actividades que se desenvolven tanto no propio centro como nos colexios e institutos, a través de iniciativas individuais, grupos de traballo e seminarios. O Centro de Formación e Recursos de Ourense presta servizo a un total de 166 centros educativos, que elaboran os seus propios plans personalizados e impulsan 315 actividades.
Por ámbitos, destacan as accións centradas na didáctica, con 90 actividades orientadas á mellora dos procesos de ensino-aprendizaxe e á actualización metodolóxica. Séguenlles as relacionadas coa convivencia e a inclusión, cun total de 68, reflectindo a aposta por contornos educativos máis equitativos.
No ámbito dixital, desenvolvéronse 51 actividades enfocadas ao reforzo da competencia tecnolóxica do profesorado e á integración de ferramentas dixitais na aula. Pola súa banda, a comunicación e o plurilingüismo suman 44 iniciativas, mentres que a innovación e a investigación pedagóxica concentran 31 accións destinadas a promover novas prácticas nos centros.
“En definitiva, unha oferta formativa ampla e equilibrada, aliñada coas necesidades actuais e orientada á mellora continua da práctica docente”, concluíu o director xeral.