Sanidade

Este programa, que se iniciou durante a pandemia en formato en liña, retómase agora de maneira presencial e busca axudar ás mulleres con cancro a recuperar a súa imaxe e autoestima

Dez mulleres en tratamento oncolóxico no Complexo Hospitalario Universitario de Ourense (CHUO) participaron esta mañá nun obradoiro de coidado da pel e maquillaxe, organizado polo Servizo de Atención ao Paciente e Humanización da Área Sanitaria de Ourense en colaboración coa Fundación Stanpa. A iniciativa, enmarcada no programa internacional “Ponte guapa, sentirás mellor”, ten como obxectivo axudar ás mulleres con cancro a recuperar a súa imaxe, fortalecer a autoestima e afrontar o proceso da enfermidade con maior confianza.

A sesión contou coa presenza de Valeria de León, coordinadora dos programas da Fundación Stanpa en Galicia; Belén Piñeiro, xefa do Servizo de Atención ao Paciente e Humanización; Nuria Seijas Fernández, psicóloga clínica do CHUO; así como voluntarias da Asociación Española Contra o Cancro (AECC) en Ourense.

Este programa, que se iniciou durante a pandemia en formato en liña, retómase agora de maneira presencial e ofrece ás participantes consellos prácticos sobre os 12 pasos esenciais para o coidado da pel e a aplicación da maquillaxe, guiadas por profesionais voluntarias do sector da estética.

Belén Piñeiro destacou “a importancia desta actividade grupal, que é moi gratificante para as mulleres participantes porque as empodera no proceso da súa enfermidade e aumenta de xeito considerable a súa autoestima”.

Pola súa parte, Nuria Seijas explicou que “durante os procesos oncolóxicos a imaxe corporal sofre moitos cambios que poden afectar á identidade e á autoestima das mulleres. Obradoiros como este axudan a reconectar co propio corpo desde o coidado e a aceptación, e poden ser unha semente que permita un cambio máis profundo para afrontar o proceso da enfermidade”. A especialista engadiu que estas actividades melloran o estado anímico e fomentan o apoio mutuo entre as participantes.

Os produtos utilizados nos obradoiros son doazóns de empresas e profesionais da cosmética, e o programa conta con voluntarios especialmente formados para ensinar ás pacientes a recuperar a súa expresión tras os efectos dos tratamentos oncolóxicos.

A Fundación Stanpa, entidade sen ánimo de lucro promovida pola Asociación Nacional de Perfumería e Cosmética, impulsa estes encontros en coordinación cos equipos de oncoloxía e enfermaría dos hospitais e coa colaboración da AECC. A través destas sesións, preténdese mostrar que a cosmética pode ser unha ferramenta útil para manter a autoestima, a confianza e a forza necesarias durante o tratamento.

Segundo os profesionais implicados, existe evidencia de que participar neste tipo de actividades mellora o estado de ánimo, reduce a ansiedade e facilita as relacións sociais, favorecendo así o benestar emocional das pacientes.