O CIM Mancomunidade de Santa Águeda entregou os premios do VI Certame “Enchemos de cor a Mancomunidade”
A Mancomunidade de Santa Águeda vén de entregar os premios do VI Certame “Enchemos de cor a Mancomunidade”, unha iniciativa do CIM dentro do programa do 8M que busca promover a igualdade a través da creatividade.
No concurso participaron os tres centros educativos da Mancomunidade (Vilamrín, A Peroxa, Amoeiro e Coles), así como a Escola Infantil de Coles, e o alumnado tivo a oportunidade de expresar, a través dos seus debuxos, valores como a inclusión, o respecto e a igualdade, enchendo de cor e ideas as paredes do Centro de Información á Muller.
Durante a entrega de premios, puidéronse ver algunhas das obras máis destacadas, que demostraron tanto talento como sensibilidade entre as nenas e nenos participantes. O acto contou coa presenza do Director Territorial de Política Social e Igualdade de Ourense, representantes dos concellos e centros educativos, así como familias e a educadora social que acompañaron ao alumnado.
Dende a Mancomunidade destacan a importancia de actividades como esta, que fomentan non só a creatividade, senón tamén a educación en valores e a construción dunha sociedade máis igualitaria desde as aulas.