O circuito ‘Correndo por Ourense’ regresa este domingo en Mariñamansa
Este domingo 7 de setembro celebrarase a carreira popular de Mariñamansa, incluída no circuito Correndo por Ourense, organizada polo Consello Municipal de Deportes do Concello de Ourense, que este ano alcanza a súa décimotercera edición. Máis de 840 corredores e corredoras tomarán parte nesta quinta proba do circuito, que comezou o pasado 27 de abril en O Vinteún e xa percorreu os barrios do Couto, Centro e Oira.
A carreira dará inicio ás 11:00 horas e percorrerá as rúas Xoán Manuel Pintos, avenida do Regato, avenida de Zamora, estrada de San Cibrao, explanada do Pazo dos Deportes Paco Paz, vereda do Papón – A Farixa, rúa da Ermida e novamente rúa Xoán Manuel Pintos.
Debido á proba, realizaranse cortes e restricións de tráfico durante a mañá do domingo. A rúa Xoán Manuel Pintos pecharase desde as 8:00 horas, mentres que as rúas do Papón e Eduardo Pondal, así como todas as vías polas que discorrerá a carreira, pecharanse ás 10:30 horas. A reapertura do tráfico está prevista a partir das 13:00 horas, salvo en Xoán Manuel Pintos, onde se prevé que sexa ás 13:30 horas aproximadamente.
O circuito continuará coa carreira de A Ponte o 19 de outubro e rematará coa proba de A Carballeira, completando así todas as etapas desta décimotercera edición do Correndo por Ourense.