O Colexio de Xornalistas e os Fotoxornalistas esixen a Jácome que retire a limitación para tomar imaxes nos plenos
O Colexio Profesional de Xornalistas de Galicia e a Asociación Profesional de Fotoxornalistas de Galicia (APFG) expresaron o seu rexeitamento á decisión do alcalde de Ourense, Gonzalo Pérez Jácome, de restrinxir a toma de imaxes nos plenos municipais aos cinco primeiros minutos de cada sesión. Ambas organizacións esixen ao goberno local que dea marcha atrás e advirten de que a medida podería ser contraria á lexislación vixente.
O pasado 26 de novembro, o Concello anunciou mediante unha nota de prensa que as fotografías e gravacións realizadas polos medios nos plenos se limitarían a ese breve tramo inicial, quedando o resto da sesión exclusivamente documentado a través da sinal institucional que o propio consistorio difunde no seu canal de Vimeo. A decisión produciuse despois do incidente rexistrado dous días antes, cando o alcalde, Gonzalo Pérez Jácome, recriminou a un fotoxornalista que, ao seu xuízo, o enfocaba “durante demasiado tempo”.
No seu comunicado, o Colexio de Xornalistas e a APFG denuncian este novo episodio de enfrontamento entre o rexedor e os medios de comunicación. Lembran que os xornalistas exercen un papel “esencial de mediación entre a cidadanía e os seus representantes políticos”, e subliñan que os cargos públicos teñen a obriga de facilitar o traballo informativo e someterse ao escrutinio público. Consideran especialmente grave que a restrición afecte aos plenos, por tratarse de actos públicos centrais na vida municipal, e alertan de que suporía privar á cidadanía de Ourense de información gráfica independente.
As organizacións destacan ademais que a medida anunciada polo Concello vulneraría o artigo 70.1 da Lei de Bases do Réxime Local, que establece a publicidade efectiva das sesións plenarias, así como o artigo 20.2 da Constitución, que prohibe a censura previa. Lembran tamén que o Tribunal Supremo xa sinalou nunha sentenza de 2007 que reservar en exclusiva aos servizos municipais a gravación dos plenos implicaba “unha sorte de censura previa”, e que noutra resolución de 2015 declarou a nulidade de calquera prohibición xeral de gravación, salvo en sesións excepcionalmente declaradas reservadas.
Por todo iso, o Colexio Profesional de Xornalistas de Galicia e a APFG “rexeitan tallantemente esta nova tentativa de restrinxir o labor xornalístico” e esixen ao Concello de Ourense que retire “a limitación intolerábel da toma de imaxes nos plenos”. Se a medida seguise adiante, anuncian que se verían obrigados a solicitar a súa nulidade de pleno dereito.