O Concello reforza o transporte público para facilitar as visitas aos cemiterios polo Día de Todos os Santos
O Concello de Ourense activará un dispositivo especial con motivo das festividades de Todos os Santos e Fieis Defuntos, co obxectivo de facilitar as visitas aos cemiterios municipais. A medida inclúe a ampliación dos horarios de apertura e o reforzo do servizo de autobuses urbanos durante os días 31 de outubro, 1 e 2 de novembro.
Os cemiterios de San Francisco, Santa Mariña e As Caldas permanecerán abertos de forma continua de 9:00 a 19:30 horas, tamén durante a fin de semana. Deste xeito, amplíanse os horarios habituais, xa que normalmente os camposantos pechan ao mediodía os días festivos e as fins de semana.
Para facilitar os desprazamentos, o Concello tamén reforzará o servizo de autobuses urbanos, ampliando o percorrido da liña 11 “Santa Mariña – O Viso” ata o cemiterio de Santa Mariña. O venres 31, os autobuses sairán cada media hora desde o cemiterio, entre as 9:15 e as 19:45 horas, e desde O Viso, entre as 8:15 e as 18:45 horas. Pola súa parte, o sábado 1 e o domingo 2, as saídas realizaranse cada hora, con horarios de 9:45 a 19:45 horas desde o cemiterio, e de 8:45 a 18:45 horas desde O Viso.
Ademais, o Bispado de Ourense informou dos oficios relixiosos que se celebrarán nos cemiterios municipais, presididos polo bispo Leonardo Lemos.
Así, o sábado, 1 de novembro, haberá misa ás 13:00 horas en Santa Mariña, e Celebración da Palabra ás 16:00 en As Caldas e ás 17:30 en San Francisco. Pola súa banda, o domingo, 2 de novembro, repetirase a misa en Santa Mariña ás 13:00 horas e a Celebración da Palabra ás 16:00 en As Caldas.
Con este dispositivo, sinalan desde o Concello, búscase garantir un acceso cómodo e seguro aos cemiterios para todas as persoas que desexen render homenaxe aos seus seres queridos nestas datas.