O Coro Universitario do campus de Ourense celebra este domingo o seu tradicional concerto de Nadal
A igrexa de Santa Eufemia, na cidade de Ourense, acollerá este ano o tradicional concerto de Nadal do Coro Universitario do campus de Ourense Schola Cantorum (CUCO). A cita terá lugar o domingo 21 de decembro ás 20.30 horas e contará con entrada libre ata completar aforo.
Seguindo a liña de edicións anteriores, o concerto reunirá tanto os coros infantil e adulto do campus como agrupacións convidadas. Nesta ocasión participarán a Capela Madrigalista de Ourense e o coro Música Viva, do Carballiño. A iniciativa está organizada pola Vicerreitoría do campus de Ourense e pretende achegar á cidadanía o traballo desenvolvido polas agrupacións corais universitarias durante o primeiro cuadrimestre do curso.
Baixo o título Deixade que canten unidos, alegres pregoamos que somos libres, o concerto ofrecerá un repertorio variado vencellado ao Nadal, con pezas de diferentes épocas, estilos, culturas e idiomas.