O 'Frei Canedo de Verán' fai público o seu programa de actividades
A Asociación Frei Canedo da Ponte organiza o vindeiro 14 de xuño a segunda edición do seu Entroido de Verán, unha celebración pensada para todos os públicos que encherá de cor, música e diversión o Campo da Feira e as rúas do barrio.
A festa dará comezo o venres ás 20:00 horas cun pasarrúas encabezado polo carismático Frei Canedo da Ponte, acompañado pola música tradicional do grupo Cantares da Cunha, que percorrerá distintas rúas da zona animando o ambiente.
O sábado será o día grande, cunha programación continua desde a mañá ata a noite. A xornada comezará ás 11:00 horas cun novo pasarrúas e ás 12:00 terá lugar a sesión vermú amenizada por Verbena Disco, mentres as crianzas poderán gozar de inchables e xogos gratuítos ata as 19:00 horas.
O xantar popular, previsto para as 14:30 horas, será outro dos momentos destacados, xunto coa festa da escuma, que se celebrará ás 17:30 horas. Xa pola tarde-noite, o público poderá participar no concurso de disfraces, tanto na modalidade individual como grupal (20:00 horas), seguido dun baile de disfraces e festa con DJ a partir das 21:00 horas.
Para completar a oferta lúdica, haberá bar, sesión vermú con pulpeiro e a presenza de food trucks durante a tarde, convertendo o Campo da Feira nun auténtico punto de encontro festivo.