O Entroido dos Farrumecos volverá a Sobradelo o 24 de xaneiro con bus desde Ourense e Allariz
O Entroido dos Farrumecos celebrarase o 24 de xaneiro en Sobradelo (Xunqueira de Ambía) cun programa que combina tradición, percorridos pola aldea e actividades para gozar da festa durante todo o día. A organización ofrece tamén servizo de autobús para facilitar a asistencia desde Ourense e Allariz, con prazas limitadas.
O bus sairá de Ourense (Parque de San Lázaro) ás 11.00 e fará a volta ás 22.00, cun prezo de 15 euros. Desde Allariz (Barreira) a saída está prevista ás 11.25 e o regreso ás 21.30, por 10 euros. Para que se realice o servizo é preciso un mínimo de 15 persoas e establécese un máximo de 59 prazas.
No programa do día, ás 12.00 terá lugar a estrea da Rinchona e a saída a Busteliño, cun percorrido pola aldea e visita ás casas. Ás 14.00 celebrarase o xantar de cocido de Entroido. Pola tarde, ás 17.00, haberá saída por Sobradelo, tamén con ruta e visitas, e ás 20.00 está prevista a entrega de premios, antes de continuar coa festa rachada ata que o corpo aguante.
As persoas interesadas poden anotarse ata o 21 de xaneiro a través de WhatsApp no 661 219 937. O cartel indica que o pagamento debe facerse ata o 20 de xaneiro e fixa as tarifas do xantar en 15 euros para socios, 20 euros para non socios e 10 euros para crianzas.