O escultor Enrique Conde amosa a súa obra en Ourense
A Sala Alterarte acolle a exposición Pensamento construído, do escultor Enrique Conde, baixo o comisariado de Xavier Riomao, artista, docente na Universidade de Vigo e coordinador do ciclo expositivo Reciprocidade. A mostra poderá visitarse ata 16 de maio neste espazo expositivo no campus de Ourense.
A exposición, explican dende o campus, reúne doce esculturas abstractas, entre as que destacan dúas pezas móbiles colgantes presentadas por primeira vez ao público. Adaptadas ao espazo da Sala Alterarte, as obras dispóñense sobre mesas ou suspendidas, creando un diálogo coa sala a través das formas e as sombras que proxectan.
Enrique Conde sinala que a madeira é o material principal da súa obra, non só como soporte senón como elemento expresivo en si mesmo. "A madeira fala por si soa", explica o escultor, quen explora nas súas creacións a relación entre as curvas, as liñas rectas e a xeometría dos espazos.
Entre as pezas expostas destaca unha escultura feita con tres rodelas de madeira de araucaria, procedente da árbore plantada en Trasalba polos pais de Otero Pedrayo ao nacer o escritor. Segundo Conde, esta madeira foi empregada para fabricar o cadaleito de Ramón Otero Pedrayo despois de que un temporal derrubase a árbore. Outras esculturas da mostra están elaboradas con madeira de limoeiro da súa propia casa ou evocan movementos naturais, como a danza dos derviches ou o balanceo dunha carballeira.
Con ‘Pensamento construído’, a Sala Alterarte ofrece unha nova oportunidade para achegarse á escultura contemporánea e ás posibilidades expresivas da madeira a través da obra dun dos referentes do construtivismo galego.