O exministro Ramón Jáuregui impartiu en Ourense unha conferencia sobre a transición organizada pola subdelegación
O subdelegado do Goberno en Ourense, Eladio Santos, puxo este mércores en valor o papel das actividades organizadas con motivo do 50º aniversario de España en liberdade. Durante a presentación da conferencia Dez claves sobre a Transición, impartida polo exministro Ramón Jáuregui no Centro Cultural José Ángel Valente, Santos insistiu en que “é fundamental entender o pasado para non retroceder en conquistas sociais”.
O acto forma parte do programa impulsado pola Subdelegación do Goberno en Ourense e o Comisionado para a Celebración dos 50 anos de España en liberdade, que ao longo destas semanas está a promover diferentes encontros para analizar este período histórico. Nesta ocasión, Jáuregui afondou nos elementos esenciais da Transición democrática.
No seu discurso, Santos lembrou que xa pasaron cinco décadas desde a morte de Francisco Franco e subliñou o significado deste tempo transcorrido. “Medio século pode parecer un intre na historia, pero neste caso representa unha transformación profunda e irreversible, que ten como resultado España plural e plenamente democrática”, sinalou.
Tamén expresou o seu agradecemento ás persoas que forman parte do ciclo de debate que se desenvolve entre o 15 de novembro e o 6 de decembro, destacando que todas elas son voces de referencia na política, o xornalismo, a cultura e o ámbito empresarial. “Este ciclo nace coa vontade de dar a coñecer o noso pasado recente; reflexionar sobre o camiño percorrido nestes 50 anos de liberdade e celebrar todo o que construímos como sociedade”, apuntou.
Pola súa banda, a comisionada para a efeméride, Carmina Gustrán, fixo fincapé na diversidade do país e no sentido de estender as actividades por toda a xeografía española. Segundo explicou, “celebrar medio século de liberdade é tamén celebrar a pluralidade que nos define como país”. Engadiu ademais que “España é un Estado diverso, rico en territorios, linguas, tradicións e expresións culturais. Por iso, ten sentido que o programa conmemorativo sexa descentralizado, para que cada recuncho do noso país participe e aporte a súa voz a esta celebración dos valores democráticos que compartimos”.