O GEAAT dirixe unha nova campaña arqueolóxica no xacemento de Armea, en Allariz
Comezou unha nova campaña de escavación no xacemento arqueolóxico de Armea, situado na parroquia de Santa Mariña de Augas Santas, no concello de Allariz. A intervención está dirixida polo Grupo de Estudos de Arqueoloxía, Antigüidade e Territorio (GEAAT) da Universidade de Vigo, e prolongarase durante catro semanas.
Esta nova fase conta co financiamento da Deputación de Ourense e da Dirección Xeral de Patrimonio Cultural, ademais da colaboración do Concello de Allariz. O obxectivo principal desta campaña é ampliar a superficie escavada e afondar no coñecemento histórico dun dos xacementos máis importantes da arqueoloxía galega.
Armea acolle xa a súa décimo cuarta campaña, un proxecto que se iniciou en 2011 e que se consolidou como unha das intervencións arqueolóxicas máis relevantes en Galicia. O xacemento destaca pola súa boa conservación e pola súa localización nun entorno rural, o que o fai especialmente singular. Tamén ten unha forte vertente formativa, atraendo cada ano a decenas de estudantes de arqueoloxía de universidades españolas e portuguesas, cunha alta demanda para participar nas escavacións.
As investigacións realizadas suxiren que Armea puido ser unha cidade romana importante, habitada entre os séculos I e III d.C., posiblemente o segundo principal núcleo urbano romano en Galicia tras Lugo. Ademais, descubriuse presenza humana anterior, da Idade de Ferro, o que amplía a cronoloxía e o valor do sitio.
A campaña deste ano está dirixida cientificamente por Adolfo Fernández, con Alba Rodríguez coordinando os traballos de campo. O equipo está formado por unhas trinta persoas, entre investigadores e estudantes, e traballa en dúas liñas principais.
A primeira, con financiamento da Deputación de Ourense, centra a súa atención na continuidade das escavacións na chamada domus dos pináculos e na rúa central empedrada do xacemento. Esta domus, unha das máis monumentais descubertas en Armea, conta cun atrio con columnas, un larario e diversas estancias. O equipo busca ampliar a escavación cara o leste da vivenda para determinar se as novas evidencias arqueolóxicas corresponden á mesma estrutura ou a outro edificio diferente. Tamén se continúa coa escavación da vía principal, coa intención de descubrir máis tramos empedrados e acceder a estratos máis antigos nos sectores aínda non escavados.
A segunda liña, financiada pola Dirección Xeral de Patrimonio Cultural, céntrase na domus norte, coñecida como do hexáscele. Aquí, o equipo quere explorar niveis arqueolóxicos anteriores ás construcións romanas, sobre todo na finca da atalaia, onde xa se localizaron restos da Idade do Ferro en campañas anteriores.
Como é habitual, o GEAAT ten previsto regresar ao xacemento en outubro para realizar tarefas de conservación e restauración das estruturas descubertas. Durante as catro semanas de escavación activa tamén se organizarán visitas guiadas para a cidadanía, co obxectivo de divulgar os avances do proxecto e achegar o patrimonio arqueolóxico á poboación.