O Goberno inviste 9 millóns de euros para reparar estradas estatais danadas polos temporais en Ourense
O subdelegado do Goberno en Ourense, Eladio Santos, supervisou no Barco de Valdeorras os traballos de asfaltado que se están a executar na estrada N-120, unha actuación incluída no Plan Especial de Reparación e Conservación de Estradas do Estado en Galicia tras os danos provocados polos temporais dos últimos meses.
Durante a visita, Santos destacou o compromiso do Goberno de España coa seguridade viaria, cun investimento de 9 millóns de euros para reparar diferentes vías da rede estatal na provincia. Segundo explicou, os traballos comezaron apenas dúas semanas despois das últimas choivas intensas.
O plan forma parte dun programa máis amplo dotado con 167 millóns de euros para toda Galicia, dos que 38 millóns corresponden a fondos extraordinarios destinados a reparar danos derivados das borrascas. Na provincia de Ourense, máis de 8 millóns de euros destínanse á mellora da rede viaria estatal.
En concreto, na N-120 están a executarse obras de emerxencia para a rehabilitación do firme cun investimento de 3 millóns de euros, dos que 900.000 se corresponden con tramos situados na provincia de Ourense. O resto da actuación realízase en treitos desta mesma vía na provincia de Lugo.
Ademais da N-120, o plan inclúe actuacións nas autovías A-52 e A-75 e nas estradas N-525, N-540, N-541 e N-532. O obxectivo destas intervencións é restaurar o estado das infraestruturas e mellorar as condicións de circulación tras os danos provocados polas sucesivas borrascas.
O subdelegado lembrou tamén que Galicia foi declarada zona gravemente afectada por unha emerxencia de protección civil, o que permitirá conceder axudas extraordinarias a concellos e deputacións para a reparación das súas infraestruturas municipais.
Xunto a estas actuacións, tamén se están executando obras nas estradas estatais da provincia para reparar danos causados polos lumes forestais do pasado ano, cun investimento de 3,8 millóns de euros en traballos como a protección de taludes, melloras de drenaxe, sinalización, balizamento e pechamento.