O Instituto de Física e Ciencias Aeroespaciais do campus de Ourense, operadora de drons autorizada pola AESA
O Instituto de Física e Ciencias Aeroespaciais (Ifcae) da Universidade de Vigo deu un paso adiante ao converterse en operadora de drons autorizada pola Axencia Estatal de Seguridade Aérea (AESA). Este logro, acadado en colaboración coa Vicerreitoría de Investigación, Transferencia e Innovación da UVigo, permitirá ao Ifcae consolidar o seu papel na investigación e transferencia tecnolóxica con vehículos aéreos non tripulados.
A administración da operadora estará a cargo dos profesores Hixinio González e Fernando Veiga, responsables do Laboratorio de Sistemas Aeroespaciais e de Transporte (Aerolab) da UVigo. Este grupo, especializado en robótica aérea e tecnoloxías relacionadas con drons, xestionará a frota e optimizará o seu uso en diversos proxectos. Os pilotos autorizados, Eduardo Ríos e Gabriel Fontenla, tamén membros do Ifcae e Aerolab, recibiron formación especializada e certificación oficial, garantindo a seguridade e a eficiencia en cada misión.
Aplicacións diversas: da monitorización á loxística
O Ifcae dispón dunha frota de drons preparada para atender necesidades en sectores como agricultura, silvicultura, construción e ámbito mariño. En agricultura, estes dispositivos facilitan a monitorización en tempo real dos cultivos, permitindo detectar enfermidades, optimizar a rega e xestionar recursos. No sector forestal, resultan útiles para vixiar áreas boscosas e detectar incendios ou cambios na masa forestal, mentres que no ámbito mariño, son ferramentas clave para recompilar datos ambientais e protexer ecosistemas en zonas de difícil acceso.
Ademais, a operadora tamén explorará o uso de drons na loxística, unha área en expansión que ofrece solucións rápidas e efectivas para o transporte de materiais en situacións complexas ou de emerxencia. Aerolab traballa en integrar intelixencia artificial nestes vehículos, co obxectivo de dotalos de capacidades autónomas para mellorar a súa resposta en diferentes escenarios.
Un fito para o desenvolvemento aeroespacial
A obtención desta acreditación supón un avance significativo para o Ifcae, consolidándoo como un referente en tecnoloxía aeroespacial e no uso de drons en sectores estratéxicos. Este logro reforza o papel do instituto e do campus de Ourense na investigación e desenvolvemento aeroespacial, e abre novas oportunidades de colaboración con entidades académicas e empresariais, promovendo a innovación tecnolóxica en Galicia.
Fundado a principios de 2023, o Ifcae busca posicionarse como un centro de excelencia en investigación e transferencia de coñecemento en física e sistemas aeroespaciais. Na actualidade, reúne arredor de medio cento de investigadores e investigadoras de diversas disciplinas coa misión de converterse nun referente no ámbito da I+D sectorial en Galicia.