O mellor cine galego chega a Allariz co Ciclo Mestre Mateo
Do 9 ao 12 de outubro, a Casa da Cultura de Allariz converterase nun punto de encontro para o público do cine galego coa celebración do Ciclo Mestre Mateo 2025. A entrada será libre ata completar aforo, permitindo que calquera interesado poida asistir ás proxeccións programadas.
O ciclo inclúe unha variada selección de longametraxes e curtametraxes para diferentes públicos. O día 9 abrirá con “Xustiza Artificial” para alumnado do IES e continuará pola noite coa proxección do documental “Prefiro Condenarme”. O día 10 a película “Honeymoon” ofrecerá unha nova cita para os afeccionados ao cinema galego. O sábado 11 haberá unha sesión de curtametraxes de imaxe real seguida da película “As Neves”. Finalmente, o domingo 12 pechará o ciclo con curtametraxes de animación e a proxección de “+Cuñados”.
Victoria Morenza, responsable de actividades culturais do Concello, destacou que esta iniciativa busca achegar a produción cinematográfica galega á cidadanía e fomentar a participación da veciñanza, desde o alumnado ata o público familiar. Todas as sesións desenvolveranse na Casa da Cultura, onde o público poderá gozar das películas de balde e coñecer de primeira man a diversidade e a calidade do cinema feito en Galicia.