O Ministerio de Transición Ecolóxica financiará con preto de 261.000 euros o proxecto Re-Habilita Rural Lab
A vicepresidenta e ministra para a Transición Ecolóxica e o Reto Demográfico, Sara Aagesen, anunciou este venres a convocatoria de axudas para o financiamento de proxectos innovadores promovidos por entidades locais para a transformación territorial, que recibirán 5,4 millóns de euros, segundo a resolución definitiva da convocatoria.
“León, con sete proxectos, é a provincia con maior número de iniciativas beneficiadas, seguida de Granada (seis), e Almería, Ourense e Zamora (cinco); e Castela e León é a comunidade que recibe un maior volume de fondos, con 5,4 millóns de euros. Despois sitúanse Andalucía, con catro millóns, e Castela-A Mancha, con 1,8 millóns”, destacou a vicepresidenta na súa intervención no II Encontro Nacional de Centros de Innovación Territorial, impulsado polo Ministerio para a Transición Ecolóxica e o Reto Demográfico (MITECO), nas instalacións da Fundación Cidade da Enerxía (CIUDEN).
O obxectivo destas axudas, xestionadas pola Secretaría Xeral para o Reto Demográfico e dirixidas a concellos de contornas rurais, é favorecer a implantación de proxectos innovadores que contribúan a acadar a equidade territorial, dando resposta ás necesidades concretas das zonas nas que se desenvolven, mediante o impulso á sostibilidade e á dixitalización, a atracción e retención de talento, a cultura ou a mobilidade rural, entre outros aspectos.
Na convocatoria de 2024, seleccionáronse 99 proxectos en 38 provincias, que recibirán máis de 19 millóns de euros para promover a innovación nas entidades locais. “Grazas a esta iniciativa un total de 77 concellos, 12 agrupacións de municipios, 10 deputacións, tres mancomunidades e unha comarca veranse beneficiadas. As súas actuacións chegan a máis de 330 pequenos municipios”, sinalou a ministra.
Entre os proxectos adxudicados, o Ministerio de Transición Ecolóxica financiará con 260.941 euros a iniciativa Re-Habilita Rural Lab, un laboratorio de innovación para a rehabilitación e rexeneración do patrimonio rural destinado ao alugueiro social para mulleres.
No proxecto, presentado hai unhas semanas, participan os concellos de San Xoán de Río, Porqueira, Boborás, Vilariño de Conso, Xunqueira de Espadanedo, Oímbra, Esgos, Taboadela e Coles.
Re-Habilita Rural Lab é un ecosistema de innovación pensado para garantir vivendas en alugueiro social a mulleres mediante a posta en valor do patrimonio rural.