O novo modelo dixital da Deputación para axudas a entidades sociais bate récord de solicitudes
A Deputación de Ourense recibiu máis de medio cento de solicitudes na convocatoria de subvencións para entidades sociais de 2025, un récord que supera amplamente os datos do exercicio anterior. En total, presentáronse 54 proxectos, fronte aos arredor de 40 do ano pasado, por un valor global de 1,8 millóns de euros.
Este incremento chega tras a posta en marcha dun novo modelo dixital de xestión, impulsado pola área de Benestar, que busca reducir a carga administrativa e acurtar os prazos de instrución e valoración. Segundo explicaron o presidente da Deputación, Luis Menor, e a deputada responsable da área, Patricia Torres, trátase dun sistema desenvolvido a partir do diálogo continuo coas entidades sociais, co obxectivo de mellorar a eficiencia e a transparencia.
O modelo foi presentado o pasado 10 de xuño nunha xornada de traballo no Centro Cultural Marcos Valcárcel, onde representantes das entidades puideron coñecer en detalle o funcionamento do novo procedemento.
En canto á financiación, as entidades solicitantes piden á Deputación un total de 450.937 euros, nunha convocatoria dotada con 350.000 euros. Isto supón que, de media, as entidades obterán o 77 % do cofinanciamento provincial solicitado. Ademais, ata 35 entidades poderán cubrir os seus proxectos na súa totalidade con fondos da Deputación, xa que recibirán o 100 % do importe solicitado.
Desde a institución provincial, valoran este resultado como unha resposta positiva ao novo modelo, destacando tanto o aumento do número de propostas como a mellora na xestión dos recursos públicos destinados ao terceiro sector.