O parque acuático de Monterrei abrirá durante todo o verán
A Xunta de Galicia, a través da Fundación Deporte Galego, sacou á licitación fai uns días a contratación da xestión, mantemento básico e limpeza do parque acuático do Complexo Deportivo de Monterrei para a campaña de verán de 2025 que comezará o próximo 18 de xuño e se extenderá ata o 14 de setembro. Durante estes días, as instalacións do parque acuático permanecerán abertas en horario ininterrompido de 12.00 a 21.00 horas, todos os días da semana.
Como novidade, este ano incorporarase o mantemento do sistema de depuración de auga, cumprindo cos controis e analíticas de auga regulamentarias. Ademais, incluiranse os servizos de xestión, mantemento básico e limpeza das instalacións. A prestación destes servizos suporá a contratación de 43 persoas, divididas nas seguintes categorías: 19 persoas socorristas, dúas enfermeiras, tres recepcionistas e outras 19 con funcións de mantemento e limpeza. A Fundación Deporte Galego garantirá a presenza de 16 traballadores de maneira continuada nas instalacións.
O orzamento da licitación será de máis de medio millón de euros (516.005,50 euros), e criterios como a aplicación de políticas empresariais en materia de conciliación terán peso no proceso de adxudicación.
Novas atraccións
Fai falta lembrar que, nas próximas datas, sairá á licitación a terceira e cuarta fase das obras do parque acuático do Complexo Deportivo de Monterrei para completar a equipación lúdica e deportiva, ampliando a instalación cara ao noroeste con novos tobogáns e elementos de multiaventura.
A fase 3 consiste en instalar catro tobogáns de caída libre en paralelo, e a fase 4 será un parque multiaventura con elementos de xogos, como tirolesas, cordas, circuítos en altura ou rocódromos. Ademais destes elementos, fórmase dotar ao espazo lúdico que ocupan estas fases de orde e calidade, convertendo esta zona nun gran espazo de relación e convivencia, humanizando e naturalizando o entorno.
Estas dúas fases terán un orzamento de case 2 millóns de euros (1.864.883,15 euros). No pasado mes de xaneiro, a Xunta e a Deputación de Ourense asinou o convenio de colaboración que garante a finalización do parque acuático de Monterrei, no concello do Pereiro de Aguiar, cunha inversión de case 3,6 millóns de euros por parte da institución provincial. A achega destinarase á execución das tres fases que restan do proxecto ao longo do bienio 2025-2026, de xeito que o orzamento global desta área deportiva e de lecer ascenderá a case 13 millóns de euros, dos que 9 millóns foron sufragados pola Xunta de Galicia.
Na campaña de 2024, no primeiro ano de funcionamento coa primeira fase completada e con apertura de xuño a setembro, o parque acuático recibiu cerca de 100.000 persoas usuarias, o que pon de manifesto a importancia do complexo para a cidadanía do entorno e a atracción de visitantes tanto doutras áreas da provincia como do resto de Galicia e do norte de Portugal.