O Parque Empresarial de Pereiro de Aguiar estreou unha imaxe renovada tras un investimento de máis de 120.000 euros
O Concello de Pereiro de Aguiar, en colaboración coa Xunta de Galicia, vén de completar novas actuacións de mellora no Parque Empresarial do municipio. Os traballos contaron cun investimento que supera os 120.000 euros e tiveron como obxectivo reforzar a seguridade e facilitar a actividade das empresas asentadas no recinto.
As intervencións incluíron a renovación das vías, cunha nova capa de rodadura e a actualización da sinalización tanto vertical como horizontal. Ademais, instalouse un novo directorio empresarial, modernizado, actualizado e iluminado para mellorar a súa visibilidade durante todo o día.
O Parque Empresarial de Pereiro de Aguiar supera actualmente os 680.000 metros cadrados e acolle preto de 100 empresas que suman arredor de 2.000 traballadores. Segundo informou o alcalde, Luis Menor, atópase xa en tramitación unha ampliación de 230.000 metros cadrados adicionais, co obxectivo de continuar favorecendo o crecemento empresarial no municipio.