O Pavillón de Coles presenta a súa oferta deportiva para o curso 2025-2026
O Concello de Coles vén de anunciar a programación deportiva do Pavillón Municipal para o novo curso 2025-2026, unha proposta que combina actividade física, benestar e diversión con horarios adaptados ás necesidades da veciñanza.
As sesións comezarán os luns, cunha dobre cita: ás 19.00 horas celebrarase a clase de forza, orientada a mellorar a resistencia e a tonificación muscular, e ás 20.00 horas terá lugar a actividade de zumba, que combina baile e exercicio aeróbico nun ambiente dinámico.
Os martes ás 20.00 horas será a quenda do ioga, unha disciplina que favorece a relaxación e o equilibrio corpo-mente. O mércores á mesma hora chegará o functional training, centrado en mellorar a capacidade física a través de movementos completos e intensos. Finalmente, os xoves ás 20.00 horas programouse a actividade de pilates, ideal para traballar a flexibilidade, a postura e a forza do core.
Desde o Concello lembran que o prazo de inscrición permanecerá aberto ata o 18 de setembro, advertindo tamén que os horarios poderían sufrir variacións en función da organización dos grupos.