O Plan Provincial de Lectura supera xa os 18.479 bonos xerados, cunha facturación de máis de 250.000 euros nas librarías adheridas
O Plan Provincial de Lectura posto en marcha pola Deputación de Ourense xerou xa un total de 18.479 bonos, dos cales se canxearon 14.895, o que se traduce nunha facturación que supera os 250.000 euros nas librarías participantes da provincia.
Para o presidente provincial, Luis Menor, estas cifras confirman que o plan acadou “todos os obxectivos: apoiar a cultura, fomentar a lectura entre a mocidade e dinamizar o comercio local”. Así o subliñou este luns durante unha visita á libraría Eixo, un dos establecementos adheridos á iniciativa, onde destacou que todas as librarías participantes lograron canxear bonos, cumpríndose así un dos principais obxectivos do programa: “dinamizar o comercio local e apoiar as librarías ourensás a nivel provincial”.
Ante o éxito da campaña, Menor avanzou que a iniciativa terá continuidade no futuro e incluso se prevé introducir melloras, xa que, en palabras do presidente, “a cultura é unha prioridade” para o goberno provincial e a resposta da cidadanía a este tipo de programas “sempre é moi positiva”.
Pola súa banda, o presidente da Asociación de Libreiros de Ourense, Javier Ibáñez, agradeceu á Deputación a posta en marcha do plan e sinalou que “nos axudou moito, sobre todo ás pequenas librarías”, amosando ademais o seu desexo de que a campaña se manteña no tempo pola súa importancia para o sector cultural.
Durante a visita, Luis Menor animou á cidadanía a descargar e canxear os bonos antes de que remate a campaña, o vindeiro 20 de decembro, e agradeceu a implicación das máis de cincuenta librarías que participaron en toda a provincia. O Plan Provincial de Lectura, dirixido a menores de 18 anos empadroados nalgún concello ourensán, consolídase así como unha ferramenta eficaz tanto para promover hábitos lectores entre a mocidade como para reforzar a economía cultural local.