O PP de Ourense vota en contra da moción para combater o transfuguismo político presentada polos socialistas
O Pleno da Deputación de Ourense rexeitou a moción presentada polo Grupo Provincial Socialista que buscaba combater o transfuguismo político. A iniciativa non saíu adiante debido ao voto en contra do Partido Popular e á ausencia do alcalde de Ourense, Gonzalo Pérez Jácome. A moción contou co respaldo do BNG e dos dous deputados presentes de Democracia Ourensana, pero o empate provocado pola ausencia do rexedor obrigou ao presidente da corporación, Luís Menor, a exercer o seu voto de calidade, que serviu para rexeitar a proposta e avalar as prácticas denunciadas polos socialistas.
O voceiro socialista, Álvaro Vila, criticou duramente ao PP, afirmando que este "segue a obviar o Pacto Antitransfuguismo e a eludir responsabilidades" mentres xustifica unha moción de censura en Manzaneda apoiada por dous concelleiros que se presentaron orixinalmente nas listas do PSdeG-PSOE. Vila engadiu que o PP "insiste en que a moción de censura era legal, mais omite de xeito deliberado que vulnera frontalmente o Pacto ao que esta mesma Deputación se adheriu por unanimidade, co voto favorable do PP, o 29 de xaneiro de 2021".
Neste sentido, o secretario provincial do PSdeG-PSOE lembrou que "a legalidade formal dunha moción de censura non exime da obriga ética e política de cumprir co Pacto Antitransfuguismo", que obriga aos partidos a "rexeitar e non admitir" nos seus grupos aos concelleiros que abandonan a formación política coa que foron elixidos. Ademais, sinalou que "o presidente Menor admitiu publicamente que o PP 'aceptou' o apoio de dous concelleiros tránsfugas. Hoxe, neste pleno, o PP ratifica esa vulneración votando en contra da nosa moción".
Respecto a Manzaneda, Vila lamentou que o PP "insistiu en imputar un desleixo na xestión do Concello de Manzaneda que non é tal" para xustificar o seu apoio aos tránsfugas. Lembrou que o PSdeG-PSOE obtivo nas eleccións do 28 de maio de 2023 unha maioría absoluta con cinco concelleiros fronte aos dous do PP, "o peor resultado da súa historia no municipio", e que o alcalde deposto reivindicou unha xestión que permitiu recibir "900.000 euros entre Xunta e Deputación, un récord".
Para Vila, "o PP pretende desacreditar o goberno socialista para encubrir unha operación coordinada desde a dirección provincial para facerse coa alcaldía mediante tránsfugas". Neste sentido, citou ao candidato popular Pedro Yáñez, quen recoñeceu que "conversamos e chegamos a un acordo" e que "sen o apoio do partido non faríamos a moción de censura", o que evidencia a implicación da dirección provincial do PP na manobra.
A ausencia de Pérez Jácome permitiu que o presidente da Deputación, Luís Menor, exerza o seu voto de calidade para rexeitar a moción. Vila cualificou esta situación de paradóxica: "Resulta paradoxal que unha moción que defende os principios democráticos sexa rexeitada mediante o voto de calidade do presidente da Deputación, que ademais é o presidente provincial do partido que vulnerou o Pacto Antitransfuguismo".
Finalmente, o voceiro socialista subliñou que "o rexeitamento desta moción constitúe unha ratificación pública da aposta do PP polo transfuguismo como estratexia política para alterar maiorías municipais" e concluíu que "o PP de Ourense envía hoxe unha mensaxe clara: está disposto a vulnerar os pactos asinados e a amparar prácticas contrarias aos principios democráticos para conseguir alcaldías a calquera prezo".