Infraestructuras

Critican que, catro anos despois, o Administrador de Infraestruturas Ferroviarias aínda non concretou unha data para licitar os traballos

Paso superior da rúa Tarascón

O Partido Popular de Ourense criticou que, catro anos despois, o Administrador de Infraestruturas Ferroviarias (ADIF) “segue dando largas” e non concreta unha data para licitar as obras do paso inferior na rúa Ramón Puga e do paso superior de Tarascón, ambas na cidade de Ourense.

Nun comunicado, o deputado popular Celso Delgado advirte de que, se non se licitan os traballos de forma inmediata en 2026, será necesario agardar a 2027 para velos en execución.

Os deputados ourensáns do PP, Celso Delgado, Ana Vázquez e Rosa Quintana, rexistraron o pasado 20 de febreiro de 2026 unha pregunta no Congreso na que cuestionaban que data de licitación manexaba ADIF para estas actuacións. A resposta do Goberno, recibida o 25 de marzo, limitouse a indicar que “os proxectos correspondentes ao Ponte de Tarascón e ao Paso Inferior en Ramón Puga en Ourense atópanse aprobados e en fase previa de licitación”.

O PP considera esta contestación “insuficiente e decepcionante”, ao entender que non fixa un calendario concreto para unha actuación que acumula anos de atraso. Neste sentido, lembran que xa pasaron case nove anos desde a sinatura, en xuño de 2016, dun protocolo entre o Concello de Ourense e ADIF para mellorar a permeabilidade nestas zonas, e máis de catro anos desde a sinatura do convenio en decembro de 2021.

Os populares sosteñen ademais que, a estas alturas, ADIF continúa sen concretar a licitación dunhas obras consideradas clave para a mobilidade na cidade. Segundo sinalan, desde 2022 sucedéronse distintos anuncios e previsións sobre o inicio dos traballos que finalmente non se materializaron, mentres que a actuación permanece en fase previa de licitación.

As obras previstas afectan a dous puntos concretos: o paso inferior na rúa Ramón Puga e o paso superior de Tarascón, ambos con limitacións de seguridade e capacidade na actualidade. O convenio asinado entre as partes contemplaba un investimento inicial que posteriormente foi modificado mediante unha adenda publicada no Boletín Oficial do Estado o 29 de decembro de 2025, que tamén amplía os prazos.

Desde o Partido Popular insisten en que a falta de concreción por parte de ADIF prolonga unha situación de espera que, ao seu xuízo, prexudica aos veciños afectados e á cidade no seu conxunto.