Actualidade

“Unha vez máis insistimos na necesidade de dar continuidade á variante con estes tres tramos, pois é fundamental para completar o trazado con dobre vía na totalidade da LAV e asegurar a súa fiabilidade", sinalan desde o PP

Obras da Variante Exterior

O Partido Popular denuncia que o “Goberno non ten intención de dar continuidade á variante exterior desde Seixalbo ata a estación de Ourense”, despois de preguntar ao Ministerio de Transportes sobre a situación da variante exterior, tanto nos tramos que están en obras como nos que aínda están pendentes de licitar.

Lembran que no prego de cláusulas administrativas da licitación das obras da estación de Ourense, que inclúe o plano de vías da futura estación, obsérvase que a liña seguirá contando con vía única entre Seixalbo e Ourense. “É dicir, non contempla a vía dobre de entrada na estación dos tres tramos pendentes da Variante Exterior, de modo que a LAV quedaría cun tramo de trazado sinuoso de 7 km e de vía única mixta, entrando ademais na estación en curva”, sinalan.

“Unha vez máis insistimos na necesidade de dar continuidade á variante con estes tres tramos, pois é fundamental para completar o trazado con dobre vía na totalidade da LAV e asegurar a súa fiabilidade, xa que, de non ser así, calquera incidencia ou avaría nunha vía única supoñería o corte do acceso ferroviario entre Galicia e Madrid”, reiteran os populares.

Tamén explican que a variante exterior, executada na súa totalidade, reduciría o tempo de viaxe entre cinco e dez minutos, xa que o tramo final cruzaría o Miño por un novo viaduto para entrar na estación de Ourense en paralelo á liña Monforte-Ourense.

Atrasos nos dous tramos de obras da Variante Exterior

O 4 de decembro de 2021, Adif Alta Velocidade adxudicou dous contratos de obras para a execución do proxecto de construción da plataforma de integración urbana e acondicionamento da rede ferroviaria de Ourense, correspondentes aos tramos Taboadela-Túnel de Rante e Túnel de Rante-Conexión Seixalbo.

O tramo entre Taboadela e o Túnel de Rante foi adxudicado á UTE formada por Construcións Sánchez Domínguez Sando e Rover Infraestruturas por un importe de 83.443.980,59 euros (IVE incluído). O prazo de execución era de 34 meses a partir da acta de comprobación de reformulo e inicio. O contrato foi asinado o 29 de decembro de 2021, a acta de reformulo ten data do 28 de xaneiro de 2022, e as obras comezaron o 29 de xaneiro de 2022, de modo que o 28 de novembro de 2024 cumpriranse os 34 meses do prazo contractual, explican.

Respecto ao tramo entre o Túnel de Rante e Seixalbo, foi adxudicado a Rover Infraestruturas por 27.448.623,45 euros (IVE incluído). O prazo de execución era de 26 meses a partir da acta de reformulo e inicio.

O contrato foi asinado o 20 de decembro de 2021, a acta de reformulo ten data do 18 de xaneiro de 2022, e as obras comezaron o 19 de xaneiro de 2022. Así, sinalan, o 19 de febreiro de 2024 cumpríronse os 26 meses do prazo contractual, o que significa que estas obras levan un atraso de oito meses.

“É evidente que as obras destes dous tramos están atrasadas e dubidamos moito que as obras da plataforma poidan terminarse en 2025”, conclúen os populares. Ademais, agregan que “o Goberno, en resposta dada o 9 de outubro a preguntas dos deputados ourensáns, omitiu responder sobre o mes e ano en que finalizarán as obras de plataforma deste tramo e cando ADIF licitará os outros contratos de superestrutura (vía) e o resto de instalacións ferroviarias”.