O PP mantén a Manuel Baltar no Senado meses despois de ser condenado por un delito contra a seguridade viaria
O 27 de xaneiro, o Tribunal Supremo condenou ao expresidente da Deputación de Ourense e senador do Partido Popular, José Manuel Baltar, por circular a 215 quilómetros por hora nun coche oficial da Deputación pola A-52, á altura de Zamora. Os feitos ocorreran en abril de 2023, cando Baltar aínda ocupaba o cargo de presidente provincial, e a sentenza chegou malia que o político negou os feitos durante o xuízo. Os maxistrados consideraron probadas as acusacións e impuxéronlle unha multa de 1.800 euros e a retirada do carné de conducir.
Malgré desta condena, o Partido Popular non só evitou calquera tipo de medida disciplinaria, senón que mantén a Baltar como senador por designación autonómica e presidente da Comisión de Despoboamento e Reto Demográfico do Senado. Un cargo que, segundo denunciou o PSOE, leva aparellado un salario de máis de 70.000 euros anuais.
Desde que se coñeceron os feitos, BNG e PSOE pediron en numerosas ocasión medidas por parte dos populares, reclamando a súa destitución inmediata.
O senador socialista por Ourense, Rafael Rodríguez Villarino, criticou no mes de marzo, cando se cumplían dous meses da sentenza, que o PP “premia” a Baltar cun posto institucional de relevancia malia ter sido condenado penalmente: “Xa abonda de impunidade, de utilizar bens públicos para fins privados e de utilizar a política como un medio para esquivar responsabilidades”, declarou.
Rodríguez Villarino lembrou que o PP, que nun primeiro momento dixo que Baltar non podía seguir sendo presidente da Deputación nin do partido na provincia, “deulle a máis alta dignidade e nomeouno senador por designación autonómica”. Criticou tamén que, desde a sentenza, o PP non lle pediu a acta, nin adoptou medida disciplinaria ningunha. “Aquí está, no Senado. E aquí está o PP, sen facer nada”, censurou o senador socialista.
Baltar foi nomeado senador en xullo de 2023, só uns meses despois do exceso de velocidade polo que foi condenado. De feito, en abril deste ano, 249 dos 251 senadores presentes na Cámara Alta votaron a favor de retirarlle o aforamento para que puidese ser xulgado, o que non impediu que continúe no cargo.
O legado dos Baltar
A presenza de José Manuel Baltar na política ourensá é unha continuidade do legado do seu pai, José Luis Baltar. Entre os dous, gobernaron a provincia durante máis de trinta anos, converténdose nos referentes históricos do PP en Ourense. En 2012, Baltar fillo sucedeu ao pai á fronte da Deputación, consolidando unha liña política marcada pola continuidade e o control orgánico do partido na provincia.
Cando anunciou a súa retirada da Deputación, propuxo como sucesor a Luis Menor, a quen cualificou como “o candidato ideal”, nun nomeamento avalado tamén polo presidente da Xunta, Alfonso Rueda, quen eloxiou a “xenerosidade” de Baltar ao ceder o cargo.
Aínda que se mantivo nun segundo plano mediático nos últimos tempos, Baltar reaparecía este ano en Fitur para apoiar a presentación da campaña turística da Deputación de Ourense, acompañado de Rueda e Menor. Un xesto simbólico que amosa que a súa influencia política segue presente, malia a condena e as peticións de dimisión.