O PP urxe ao Goberno a licitar en 2025 as obras de mellora da EDAR de San Cibrao das Viñas e o saneamento do Barbaña
Os deputados ourensáns do Partido Popular Celso Delgado, Ana Vázquez e Rosa Quintana rexistraron o pasado 22 de abril no Congreso unha pregunta dirixida ao Goberno en relación co proxecto de saneamento do río Barbaña. Nel recordaban que “o BOE do 10 de abril de 2025 publicou o Anuncio da Subdirección Xeral de Dominio Público Hidráulico e Infraestruturas da Dirección Xeral da Auga do Ministerio para a Transición Ecolóxica e o Reto Demográfico, relativo á aprobación técnica do Proxecto de finalización do saneamento do río Barbaña. Mellora da EDAR de San Cibrao das Viñas. fase II (Ourense)”.
Segundo expuxeron, “a Resolución aproba tecnicamente o Proxecto por un orzamento base de licitación de corenta e tres millóns douscentos corenta e nove mil cincocentos setenta euros con setenta e cinco céntimos (43.249.570,75 euros) co 21 % de I.V.A. incluído e cun prazo de execución de trinta (30) meses. E encomenda á Confederación Hidrográfica do Miño-Sil a realización da acta de replanteo do proxecto”.
“Celebramos que se ditase esa Resolución que se facía de rogar e pola que nos viñemos interesando os deputados ourensáns do PP con reiterada insistencia”, sinalaron. Non obstante, advertiron tamén que “a tramitación deste Proxecto tivo moitas incidencias, erros, e a lamentable perda de financiamento con cargo ao FEDER 2014-2020, en cantidade de 14.889.406,18 euros”.
Recordaron ademais que “o 6 de xullo de 2017 o Ministerio de Agricultura e Pesca, Alimentación e Medio Ambiente licitou a redacción do proxecto, que despois foi contratado polo Ministerio para a Transición Ecolóxica en xullo de 2018”. Posteriormente, “houbo que esperar ata o 18 de novembro de 2021 para que se sometese a información pública”. Non foi ata o 8 de febreiro de 2024 cando “a Dirección Xeral de Calidade e Avaliación Ambiental formulou a declaración de impacto ambiental” e o 14 de xaneiro de 2025 o BOE volveu anunciar a súa información pública.
“Desexamos e esperamos que este ano 2025 sexa o da licitación destas tan ansiadas obras”, afirmaron, lembrando que “ese foi o último compromiso do Goberno, que o 21 de febreiro de 2025 nos respondeu por escrito que ‘a previsión actual é que as obras poidan ser licitadas ao longo do presente ano 2025’”.
O 4 de xuño de 2025 chegou a resposta do Executivo: “O expediente do Proxecto Finalización do Saneamento do Río Barbaña. Mellora EDAR San Cibrao das Viñas – Fase II, aprobouse tecnicamente o 2 de abril de 2025. No momento actual atópase en tramitación a aprobación económica, necesaria para proceder á súa licitación, que se estima que poida iniciarse ao longo do segundo semestre de 2025”.
Os deputados populares lamentan que o Ministerio para a Transición Ecolóxica volva aprazar os prazos: “agardábamos que a licitación destas ansiadas obras tivera lugar no primeiro semestre de 2025 pero agora o MITECO remite ao segundo semestre advertindo que está ‘en tramitación a aprobación económica necesaria para a licitación’”.
Critican tamén que esta tramitación “non se vexa afectada pola circunstancia de que o Goberno socialista leva xa os anos 2024 e 2025 sen presentar no Congreso dos Deputados o proxecto de Lei de Orzamentos Xerais do Estado, prorrogados desde 2023”. E Celso Delgado advirte: “ademais, a enorme debilidade do executivo, asolado por casos gravísimos de corrupción, pode conducir a unha pronta disolución das Cortes Xerais que tería efectos negativos nas licitacións”.
Lembran tamén que “o MITECO perdera a cofinanciación da Unión Europea”, en referencia aos “14.889.406,18 euros que ía aportar o FEDER 2014-2020 e que por desidia e mala xestión gubernamental venceu a data límite para certificar gasto á Unión Europea que foi o 31 de decembro de 2023”.
Non esquezan tampouco que se ofreceron “informacións non veraces, como por exemplo en xaneiro de 2022, cando o presidente da CHMS indicou en nota oficial que as obras se licitarían a finais de 2022 e tal cousa evidentemente non ocorreu”.
Os populares insisten na urxencia do proxecto, “absolutamente necesario para garantir o saneamento do río Barbaña, tratando cunha instalación moderna e de maior capacidade as augas residuais dunha poboación que foi aumentando notablemente e as das actividades industriais do maior polígono da nosa provincia”, afirma Celso Delgado.
Tamén subliñan que “o mesmo interese e preocupación foi expresado pola Asociación de Empresarios do Polígono de San Cibrao, unha área industrial que leva anos esforzándose para ser modelo desde o punto de vista medioambiental, ao igual que as súas empresas”.
Finalmente, lembran que “o Concello de San Cibrao vén recibindo importantes multas que cargan seriamente a economía municipal, polo ‘incumprimento das condicións establecidas na autorización de vertido’” e conclúen que esas sancións “poderían terse evitado se desde o MITECO e a CHMS se executasen xa esas obras de ampliación da EDAR proporcionando as solucións técnicas esixibles”.