O prazo para presentar as solicitudes ao programa de Termalismo Social da Deputación de Ourense abrirá o 7 de xaneiro
O programa de Termalismo Social da Deputación de Ourense para o ano 2026 abrirá o vindeiro 7 de xaneiro o prazo para presentar solicitudes. Desde esa data, as persoas interesadas poderán tramitar a súa participación a través de internet, así como por outras vías habilitadas para facilitar o acceso ao programa.
Ademais da solicitude en liña, a Deputación ofrecerá atención presencial nas oficinas da Área de Benestar, situadas no edificio de Correos da rúa Progreso, a partir das 8:30 horas. Tamén será posible realizar as xestións a través dos traballadores sociais da maior parte dos concellos da provincia ou contactando directamente cos balnearios participantes, que actúan como entidades colaboradoras.
O programa permitirá gozar de estancias termais ao longo de todo o ano, xa que os balnearios ofertarán quendas desde xaneiro ata decembro de 2026. A primeira destas estancias comezará o 19 de xaneiro no balneario de Laias, apenas uns días despois da apertura do prazo de solicitudes.
A modalidade con maior número de prazas será a de estancias de seis días e cinco noites, que inclúe aloxamento, pensión completa, técnicas termais e acceso ás piscinas de augas mineromedicinais. Xunto a esta opción, o programa contempla outras modalidades adaptadas a diferentes necesidades.
Toda a información detallada sobre modalidades, prezos, requisitos e calendario de quendas xa pode consultarse na páxina web termalismourense.com, onde figuran os balnearios participantes e as novidades do programa para 2026. Así mesmo, a Deputación habilitou varias liñas telefónicas para atender consultas informativas ante o previsible aumento da demanda nos primeiros días do prazo.