O programa ExportOU impulsa a internacionalización das empresas ourensás
A Deputación de Ourense reforza o seu “compromiso crecente” coa expansión internacional das empresas da provincia mediante o programa ExportOU, que este xoves celebrou un taller de produtividade baseado en intelixencia artificial na sede da Confederación Empresarial de Ourense (CEO).
O deputado de Representación Institucional, Rosendo Fernández, inaugurou o taller e destacou a aposta da Deputación por apoiar a innovación, a dixitalización e a proxección internacional das compañías ourensás. Fernández lembrou, ademais, que este ano a institución aumentou a súa inversión no programa ata os 80.000 euros, fronte aos 75.000 euros dos anos anteriores.
Durante a sesión, os participantes puideron coñecer de xeito práctico como aplicar ferramentas de intelixencia artificial na súa actividade profesional, mellorando a produtividade, a organización de tarefas e a toma de decisións.
ExportOU cumpre oito anos desde a súa posta en marcha e converteuse nun programa de referencia na provincia. Ao longo deste tempo, rexistráronse máis de 300.000 usuarios procedentes de 41 países, recibíronse 700.000 visitas á plataforma dixital, celebráronse máis de 770 encontros comerciais e máis de medio cento de empresas formaron parte do directorio internacional “Marca Ourense”.