Asociacións

Denuncian que as instalacións ás que o alcalde pretende trasladar á Aagrupación Miño, na Casa da Maxia, “non responden ás necesidades reais da asociación nin do movemento veciñal da cidade”

As edís do grupo municipal socialista denuncian que as instalación ás que o Concello de Ourense pretende trasladar á Agrupación Veciñal Miño, situadas na Casa da Maxia, “non responden ás necesidades reais da asociación nin do movemento veciñal da cidade, e que supón un novo paso na estratexia do alcalde de Ourense, Gonzalo Pérez Jácome, para silenciar, ningunear e debilitar ás entidades veciñais”.

Así o advertiron tras unha visita a este espazo xunto a representantes da agrupación, que acusan ao Concello de intentar xustificar a decisión nun suposto aforro en alugueiros, cando a realidade, explican, é que a Agrupación Miño leva desde o ano 2011 nun local da rúa Doutor Marañón cun custo mensual de 700 euros, unha cantidade que consideran “absolutamente irrisoria para as arcas municipais”. Dende a asociación denuncian ademais que dende o Goberno municipal “preténdese trasladar a entidade a un inmoble municipal baleiro, cedéndolle dúas das súas tres plantas e obrigándoa a compartir espazo cunha asociación moito máis pequena, como é As Burgas”.

O alcalde deu de prazo ata o 28 de febreiro para executar o desaloxo e o traslado. Unha decisión segundo o PSdeG fíxose “sen diálogo real nin planificación, e sen ter en conta que a Agrupación Miño representa a 22 asociacións veciñais que precisan dun espazo funcional, accesible e axeitado para o seu traballo diario”.

“O novo emprazamento proposto non é accesible, non favorece a participación da veciñanza, terá menos afluencia de persoas, carece de espazos adecuados para reunións e asembleas e, en definitiva, non responde ás necesidades dunha entidade que exerce unha función social imprescindible na cidade”, afirman as socialistas.

Lembran, ademais, que a Agrupación Miño desenvolve programas de apoio social de enorme relevancia, entre eles un servizo de acompañamento e atención a mulleres en situación de especial vulnerabilidade, co que se prestou axuda a máis de 150 mulleres. Por iso, insisten en que “este tipo de intervencións requiren espazos dignos, seguros e que garantan a confidencialidade, algo que dificilmente poderá manterse nunha instalación compartida, sen acondicionar e sen as condicións mínimas de privacidade. Este traslado pon en serio risco a continuidade deste programa e doutros similares”.

Este caso, din as socialistas, “non é un feito illado, senón un ataque máis ao movemento veciñal”, que poñen exemplo outras acción promovidas nos últimos anos dende o executivo de Pérez Jácome, como o desmantelamento da Oficina de Participación Cidadá, o recorte de subvencións, a supresión de cursos e actividades cofinanciadas polo Concello e os ataques persoais e institucionais a representantes veciñais.

Desde o grupo municipal socialista reiteran o seu apoio firme ao movemento veciñal e á Agrupación Miño e destacan que “as asociacións de veciños cumpren unha función social esencial e que a súa desaparición ou debilitamento empobrece a democracia local”. Por iso, fan un chamamento “á reactivación e á mobilización do movemento veciñal para defender todo o que custou décadas conquistar”. “O que está en xogo”, advirten, “non é só un local, senón o dereito da veciñanza a ter voz propia, espazos dignos e capacidade de organización”.