O PSdeG critica a designación de Miguel Tellado como pregoeiro da Festa da Vendima de Leiro
A Executiva Provincial do PSdeG-PSOE fixo pública a súa firme oposición á elección de Miguel Tellado, secretario xeral do PP, como encargado de pronunciar o pregón da Festa da Vendima de Leiro 2025. O secretario provincial socialista, Álvaro Vila, asegurou que "se trata dunha decisión baseada unicamente en intereses ideolóxicos, xa que Tellado non conta nin co prestixio nin coa vinculación co mundo do viño que debería ter a persoa que inaugure un evento recoñecido como de interese turístico de Galicia e sustentado con fondos públicos".
Vila expresou o apoio total da dirección provincial ao grupo socialista de Leiro, que denunciou a "politización" dunha cita que durante décadas foi símbolo da cultura e da tradición vitivinícola galega. "Miguel Tellado non representa nin o sector cultural nin o vitivinícola do Ribeiro. Este nomeamento responde só a unha estratexia partidista do PP e exemplifica o uso clientelar dunha festa que pertence a toda a veciñanza", afirmou o dirixente.
O responsable provincial do PSdeG-PSOE lembrou que a designación segue unha liña xa iniciada en 2019, cando a chegada do PP ao goberno local marcou un cambio na elección dos pregoeiros. "Mariano Rajoy en 2019, varios conselleiros da Xunta en 2022 e 2024, e agora Miguel Tellado en 2025. O PP converteu a Festa da Vendima nun escaparate político no canto de homenaxear a viticultura e a tradición do Ribeiro", declarou Vila.
Segundo o líder socialista, esta decisión supón "un desprezo para escritores, xornalistas, divulgadores, adegueiros e demais representantes do sector que son quen realmente transmiten a esencia cultural e económica da comarca". Ao mesmo tempo, lamentou que "mentres se promocionan cargos políticos alleos ao territorio, aqueles que levan décadas traballando pola dignificación do Ribeiro quedan relegados".
A Executiva Provincial reclamou que a Festa da Vendima volva á súa filosofía inicial, recoñecendo a contribución das persoas vinculadas á cultura, á historia e ao viño. "Non se pode permitir que unha celebración de interese turístico galego se use como instrumento de propaganda sufragada cos cartos de todos", advertiu Vila.
Finalmente, o secretario provincial anunciou que os socialistas ourensáns apoiarán todas as accións do PSdeG de Leiro orientadas a recuperar o carácter orixinal da festa. "Seguiremos denunciando esta instrumentalización política dun evento que debe ser patrimonio común e non plataforma electoral do PP", concluíu.