O PSdeG de Ourense organiza un encontro con Belén Codina para debater sobre os retos sanitarios de España

Durante a xornada abordaranse cuestións clave como a preparación do sistema sanitario ante futuras crises, o impacto do cambio climático na saúde ou os efectos da reforma da Lei Antitabaco.

O Grupo Municipal Socialista de Ourense celebrará este venres, ás 20.00 horas, un encontro aberto ao público con Belén Codina, experta en xestión sanitaria, para analizar os principais desafíos do sistema público de saúde. O acto terá lugar na sede do PSOE na cidade e contará con entrada libre ata completar aforo.

Belén Codina conta con máis de dúas décadas de experiencia no sector sanitario, tanto en xestión pública como na industria farmacéutica e na consultoría. Exerceu como asesora técnica do Embaixador en Misión Especial para a Crise Internacional da COVID-19 e a Saúde Global, ademais de coordinadora da Alianza de Saúde UE-ALC na Fundación CSAI do Ministerio de Sanidade, colaborando coa AECID e coa Comisión Europea no fortalecemento dos sistemas de saúde.

O encontro forma parte da programación de outono do Comité Executivo Municipal do PSdeG-PSOE de Ourense, que inclúe tamén outras actividades de carácter social e solidario. Entre elas, a festa solidaria contra o cancro de mama, prevista para o xoves 19 en Oira, coa participación de mulleres do colectivo local, e as IV Xornadas LGTBI “Ourense polas Bandeiras”, organizadas xunto ás Xuventudes Socialistas, que se celebrarán a finais de mes.